Hi everyone!

First of all: Stellet iich mal der Afang vumenä Horrorfilm vor. Än Gruppä Jugendlichi, wo irgendwo im Busch ussä miterä plantä Tour underwägs sind. Handy-Signal hets niänä, und uf derä Strass fahrt, wenns guät chund, all Stund mal äs Aito durä. Und jetzt ratet mal was ich a dem Wuchänändi erläbt ha…

Also ich fah mal ganz am Afang a. Ich ha anstatt än Flug vu Melbourne nach Sydney än 3 Tages-Trip buächet, dass heisst miär sind am Samschtig morgä gstartet. Büsli und Tourguide hend mich abgholt und miär sind denn zersch mal äs Wiili lang gfahrä. Denn simmer in Wilsons Promontory (oder wiä ai immer as mä das schriibt) acho und sind det än chliinä Bushwalk gah machä. Wilsons Promontory isch der südlichschti Punkt vu Australiä und isch än National Park. Wiä gseit simmer dert ä chli ga laifä und ja hend vili vili Kangoroos gseh (isch afengs langsam normal wordä hiä :)) und usserdem ai eini vu dä gfährlichschtä Spinnä vu der Wält: Diä mit dem rotä Chriz ufem Riggä. Diä isch villicht so 5 Millimeter gross gsi, cha dich aber killä wenn sie wott. Nach dem simmer zu Port irgendwas gfahrä und sind det ufnä Hüggel üfä gluffä (sie hend dem Mountain gseit aber na ja…) D Üssicht vu det isch genial gsi! Nach dem simmer denn zu iiserer Accomodation gfahrä am Lake Entrance.

Am nächschtä Tag hets denn gheissä: „Snowy Mountains we’re coming!“ Aber na ja wiä scho am Afang erwähnt, das ganzä isch denn nit sooo ganz gluffä wiä miär hend wellä. Aaaaalso miär sind zersch mal vum State Victoria nach New South Wales gfahrä und uf der fahrt dert anä isch iis denn dr Bus üsgstigä. D Chiälig isch kaputt gsi. Das heisst dr Motor isch vollkomme uberhitzt gsi und dur das, dass irgend än Schlüch durchtrännt gsi isch oder so, hemmer nimmä chennä wiiter fahrä. Und ja wiä obe erwähnt, dass isch irgendwo ider Wildnis gsi. Was machemer jetzt. Na ja muss halt 1 Tourguide Hitch-hiking (Aito-stop) machä. „No worries, I will be back in at least 3 hours.“ (Kei angscht, ich wirdä i mindeschtens 3 Stund zrugg sii). Na ja äs sind denn 5 Stund drüss wordä. Aber miär hend iisers Vergnüägä mal gha. Hend zimlich ider Nöchi (nach eppä 5 Minütä durä Bush wanderä) än River gfundä, wo miär iis chli hend chennä abchiälä und ja äs paar Bilder sind denn nu entstandä :) Aber ja nach 5 Stund hemmer denn scho afengs dänkt, jaaaaa jetzt chended miär denn eppä wiiter! Usem Snowy Mountains Trip isch denn nix meh wordä, will ja äs isch denn abig am 7ni wordä bis miär dert acho sind, anstatt Namittag am 2i. Aaaaalso simmer eigentlich mal der ganz Tag eifach Aito gfahrä…

Am nächschtä Tag, also hit, simmer denn nu Canberra gah aluägä. Canberra isch ja bekanntlich d Haiptstadt vu Australiä. Isch eigentlich än chliini Stadt, aber wirklich schön :) Miär sind dert denn ids Parlaments-Gebäude, ids National Museum und nu ds War-Memorial gah aluägä. Isch nu huärrisch interessant gsi :) Da sich Sydney und Melbourne nit hend chennä entscheidä, wer as sell d Haiptstadt vu Australiä wärdä, hend sie beschlossä, dass sie än Stadt machet ider mitti und diä zur Haiptstadt ernännet. Und so entstand Canberra :) Hani doch nu eppis glernt :) Ah ja und d Aboriginals sind zersch für langi Ziit gar nit as Human Beings (Mänschä) anerkännt wordä hiä. Diä sind as Flora und Fauna agseh wordä… stupid Aussies. Aber das het sich jetzt ja gänderet. Uf jedä fall simmer denn nacher uf Sydney gfahrä und ja jetzt bini hiä i mim Backpackers, wo ich 4 Nächt wirdä bliibä und denn ändlich ändlich zrugg i diä verschniit Schwiiz reisä.

Freiwä mich jetzt scho iich alli wider z gseh!!!

See you!

Lindi :)